Решения КДК

Рассмотрении протеста №04 от 20.11.2026

20.11.2026

Рассмотрении протеста №04 от 20.11.2026

«ЖІГЕР» КОМАНДАСЫНЫҢ РЕСМИ НАРАЗЫЛЫҒЫНА ЖАУАП Кімге: «Жігер» командасының басшылығы мен өкілдеріне Тақырыбы: «Сарыарқа» – «Жігер» командалары арасындағы кездесуде орын алған даулы эпизодқа қатысты наразылықты қарау нәтижесі Құрметті «Жігер» командасының өкілдері! Қазақстан әуесқой футбол лигасының Ұлытау облысы бойынша ұйымдастыру комитеті Сіздердің «Сарыарқа» және «Жігер» командалары арасындағы кездесуде орын алған төрешілік шешімге қатысты жолдаған ресми наразылықтарыңызды қарастырды. Кездесудің екінші таймының 16 минут 35 секундында орын алған даулы эпизод бойынша ұсынылған бейнематериалдар зерделеніп, ойыншылардың әрекеттеріне, төрешілердің қабылдаған шешімдеріне және ойын ережелерінің қолданылуына талдау жүргізілді. 1. Ойын эпизодына берілген баға Аталған эпизодта «Сарыарқа» командасының ойыншысы Шахманов Архат қорғаныс әрекетін орындау барысында доптың қозғалыс бағытын жабу мақсатында сол аяғын доптың траекториясына қарай бағыттаған. Осы сәтте «Жігер» командасының ойыншысы Канат Бекзат шабуылды жалғастыру барысында қарсыласымен соқтығысқан. Бейнематериалды талдау барысында соқтығысудың Шахманов Архаттың тірек қызметін атқарып тұрған оң аяғы тұсында орын алғаны байқалады. Қорғаушының сол аяғын доптың қозғалыс бағытына бағыттауы допты бұғаттауға бағытталған ойын әрекеті ретінде бағаланды. Қарастырылған бейнематериалда Шахманов Архат тарапынан қарсыласын қасақана тоқтату, аяқтан шалу немесе ережеге қайшы күш қолдану белгілері жеткілікті дәрежеде анықталған жоқ. Осыған байланысты ұйымдастыру комитеті аталған эпизодта «Сарыарқа» ойыншысының әрекетін айып добын тағайындауға жеткілікті негіз жоқ деп есептейді. 2. Төрешінің әрекетіне берілген баға Даулы эпизод барысында алыс жақтағы бүйір сызықта орналасқан төреші Закиржанов Мади ойын жағдайын толық бағаламай, шабуыл аяқталмай тұрып ысқырық беріп, ойынды мерзімінен бұрын тоқтатқан. Аталған сәтте «Жігер» командасының ойыншылары допқа иелік етуді сақтап, шабуылды жалғастыру мүмкіндігіне ие болған. Футзал ережелерінде көзделген артықшылық қағидатына сәйкес, егер ойын ережесінің бұзылуы орын алып, алайда зардап шеккен команда үшін шабуылды жалғастыру тиімді болса, төреші артықшылық қағидатын қолдану мүмкіндігін бағалауы тиіс. Бұл жағдайда Закиржанов Мади ойын эпизодының одан әрі дамуын күтпей, ысқырық беру арқылы шабуылдың жалғасуына кедергі келтірген. Сонымен қатар, жақын бүйір сызықта орналасқан екінші төреші ойын жағдайын өзіне қолайлы ракурстан бақылап, ойынды тоқтатуға негіз көрмеген. Ұйымдастыру комитеті төреші Закиржанов Мадидің шабуыл аяқталмай тұрып ысқырық беруін төрешілік қателік деп бағалайды. 3. Ұйымдастыру комитетінің қорытынды шешімі Жоғарыда баяндалған мән-жайларды, ұсынылған бейнематериалдарды және ойын ережелерін ескере отырып, Қазақстан әуесқой футбол лигасының Ұлытау облысы бойынша ұйымдастыру комитеті төмендегідей шешім қабылдайды: 1. «Жігер» командасының даулы эпизод бойынша голды есепке алу туралы талабы қанағаттандырусыз қалдырылсын. 2. «Сарыарқа» командасының ойыншысы Шахманов Архаттың әрекетінде айып добын тағайындауға жеткілікті негіз анықталмаған деп танылсын. 3. Төреші Закиржанов Мадидің шабуыл аяқталмай тұрып ысқырық беруі ойын жағдайын бағалауда жіберілген төрешілік қателік деп танылсын. 4. Төреші Закиржанов Мадиге қатысты тәртіптік шара қолданылып, ол КЛЛФ аясындағы алдағы 2 (екі) кездесуге төрелік етуден шеттетілсін. 5. Төрешілер құрамына артықшылық қағидатын дұрыс қолдану, ойын эпизодтарын жан-жақты бағалау, төрешілер арасындағы өзара үйлесімділік және VAR жүйесін пайдалану тәртібі бойынша қосымша түсіндіру жұмыстары жүргізілсін. 4. Қорытынды Қазақстан әуесқой футбол лигасының Ұлытау облысы бойынша ұйымдастыру комитеті жарысқа қатысушы барлық командаларға тең жағдай жасау, төрешілік шешімдердің әділдігін қамтамасыз ету және жарыстың спорттық беделін сақтау қағидаттарын басшылыққа алады. Ұйымдастыру комитеті төрешілер тарапынан жіберілген қателіктерді назардан тыс қалдырмайды және олардың қайталануына жол бермеу мақсатында тиісті шаралар қабылдайды. Сонымен қатар, төрешілік қателіктің орын алуы өздігінен ойын ережелеріне қайшы түрде голды есепке алуға негіз бола алмайтынын атап өтеміз. «Жігер» командасына әділ бәсекелестікті қамтамасыз етуге бағытталған белсенді ұстанымы мен ресми өтініші үшін алғыс білдіреміз. Алдағы кездесулерде барлық командаларға сәттілік, өзара құрмет пен әділ ойын тілейміз. Құрметпен, Қазақстан әуесқой футбол лигасының Ұлытау облысы бойынша филиалының басшысы - Сатыбалдин Ш.К.